كۆنگره‌یه‌ك بۆ نوێبوونه‌وه‌

30-5-2010

له‌یادی دامه‌زراندنیدا (یه‌كێتیی نیشتمانیی كوردستان) بۆ جاری سێهه‌م كۆنگره‌ی خۆی ده‌به‌ستێت، كه‌214 كه‌س بۆ ئه‌نجومه‌نی ناوه‌ندی یه‌كێتیی كاندیدكراون و له‌ناو ئه‌م كاندیدانه‌دا (39)یان له‌ژنان پێكهاتوون، كه‌بۆ ئه‌نجومه‌نی ناوه‌ندی خۆیان هه‌ڵبژاردووه‌، هه‌روه‌ها (206) كه‌س بۆ كۆمیته‌ی سه‌ركردایه‌تی خۆیان كاندیدكردووه‌ له‌ناو ئه‌مانه‌شدا ژماره‌یه‌كی دیكه‌ له‌ژنان به‌شدارن تیایدا، كۆنگره‌كه‌ به‌مه‌به‌ستی چاكسازی و گۆرانكارییه‌كانی ناو یه‌كێتییه‌و سه‌ر له‌نوێ هه‌ڵبژاردنی ئه‌نجومه‌نی ناوه‌ندی و سه‌ركردایه‌تییه‌، دواتریش سه‌رۆكی حزب و جێگره‌كه‌ی دیاری ده‌كرێت.
بڕیار وایه‌ له‌به‌رواری (1/6/2010 )دا ئه‌م كۆنگره‌یه‌ ببه‌سترێت و ده‌ست به‌كاره‌كانی خۆی ده‌كات.
رۆژی سێشه‌ممه‌ له‌ته‌لاری هونه‌ری شاری سلێمانی هاوكات له‌م كۆنگره‌یه‌دا رێژه‌یه‌كی به‌رچاو له‌ژنان و گه‌نجان سه‌رده‌كه‌ون بۆ كۆمیته‌ی سه‌ركردایه‌تی لێره‌دا په‌یڕه‌و پرۆژه‌ی ناوخۆ و چه‌ندان پرۆژه‌ی تر گه‌ڵاڵه‌ ده‌كرێت و گفتوگۆیان له‌سه‌ر ده‌كرێت و ده‌بێته‌ یاساو ده‌ستور بۆ (ی.ن.ك)، ئه‌مه‌ دوا به‌دوای ئه‌وه‌ دێت كه‌پێشتر كۆنفرانسی كۆمیته‌كان و مه‌ڵبه‌نده‌كان كرا، كه‌هه‌ر مه‌كته‌بێكی یه‌كێتیی (7) ئه‌ندامی بۆ كۆنگره‌ هه‌ڵبژاردو مه‌كته‌بی رێكخستنیش (9) ئه‌ندامی هه‌ڵبژاردووه‌.